Isa 16 | NdeIBE | STEP | Thumelani amawundlu kumbusi welizwe njengendlela yokuhlonipha evela eSela, edabula enkangala, esiya entabeni yeNdodakazi yeZiyoni.

Isaiah 16

1 Thumelani amawundlu kumbusi welizwe njengendlela yokuhlonipha evela eSela, edabula enkangala, esiya entabeni yeNdodakazi yeZiyoni.

2 Njengenyoni ephaphazelayo isuswe esidlekeni, banjalo abesifazana baseMowabi emazibukweni ase-Arinoni.

3 “Sinikeni iseluleko, yenzani isinqumo. Yenzani isithunzi senu sibe njengobusuku emini enkulu; bafihleni ababalekayo, linganikeli iziphepheli.

4 Vumelani iziphepheli zamaMowabi zihlale kini; libe yisiphephelo sazo kubachithi.” Umcindezeli uzakufa, ukuchitheka kuzaphela, umhlaseli uzanyamalala elizweni.

5 Ngothando kuzamiswa isihlalo sobukhosi, ngokwethembeka indoda izahlala kuso – ivela endlini kaDavida – yona ethi ekwahluleleni ifune imfanelo njalo iphangisisa indlela yokulunga.

6 Sizwile ngokuzigqaja kukaMowabi. Ukuzigqaja kwakhe kokuzikhukhumeza lokuzazisa, ukuzigqaja kwakhe lobuqholo bakhe – kodwa ukuzikhukhumeza kwakhe kuyize.

7 Ngakho-ke abaseMowabi bayalila. Balilela iMowabi ndawonye. Khalani libubulele abantu baseKhiri Haresethi.

8 Amasimu aseHeshibhoni ayabuna, anjalo lamavini aseSibhima. Ababusi bezizwe sebewanyathelele phansi amavini amahle kuqala ayefika eJazeri, njalo anda kusiya ngasenkangala. Amahlumela awo anaba aze ayafika ngasolwandle.

9 Ngakho ngiyakhala njengalokhu iJazeri ikhala, ngikhalela amavini aseSibhima. Awu Heshiboni, Awu Eleyale, ngilithambisa ngezinyembezi. Ukuklabalalela izithelo zenu esezivuthiwe ngentokozo lezivuno zenu sekuphelile.

10 Ukuthokoza lokuthaba akusekho ezivinini; kakho ohlabelayo loba amemeze ezivinini; kakho onyathela iwayini ezikhamelweni ngoba umsindo sengiwuqedile.

11 Inhliziyo yami ikhalela uMowabi njengechacho, ingaphakathi yami ikhalela iKhiri Haresethi.

12 Lapho uMowabi evela endaweni yakhe ephakemeyo uyazidinisa nje kuphela; lalapho esiya endaweni yakhe yokukhonzela ukuba akhuleke akusizi lutho.

13 Leli yilizwi uJehova avele eselikhulumile ngoMowabi. 14 Kodwa khathesi uJehova uthi: “Phakathi kweminyaka emithathu, njengesisebenzi esibotshwe yisivumelwano singayibala, udumo lukaMowabi labantu bakhe bonke abanengi kuzakweyiswa, njalo abazasinda bakhona bazakuba balutshwana kakhulu njalo bengelamandla.”